Vijnë reagimet e para nga Teherani, pas sulmeve amerikane ndaj objekteve bërthamore të Iranit

---

Pas sulmeve amerikane, kanë ardhur edhe reagimet e para nga Irani.

Ministri i jashtëm i Iranit, Seyed Abbas Araghchi, e quajti sulmin “të egër” “sjellje jashtëzakonisht të rrezikshme, të paligjshme dhe kriminale”.

Ai shtoi se çdo anëtar i Kombeve të Bashkuara duhet të “alarmohet” nga “shkelja e rëndë e kartës së OKB-së”, shkruajnë mediat e huaja,

“Shtetet e Bashkuara, një anëtare e përhershme e Këshillit të Sigurimit të Kombeve të Bashkuara, kanë kryer një shkelje të rëndë të Kartës së OKB-së, ligjit ndërkombëtar dhe NPT-së duke sulmuar instalimet bërthamore paqësore të Iranit”.

“Ngjarjet e këtij mëngjesi janë të egra dhe do të kenë pasoja të përjetshme. Çdo anëtar i OKB-së duhet të alarmohet për këtë sjellje jashtëzakonisht të rrezikshme, të paligjshme dhe kriminale. Në përputhje me Kartën e OKB-së dhe dispozitat e saj që lejojnë një përgjigje legjitime në vetëmbrojtje, Irani rezervon të gjitha opsionet për të mbrojtur sovranitetin, interesin dhe popullin e tij”, ka shkruar Araghchi.

Ndërkohë një reagim ka ardhur edhe nga Agjencia atomike e Iranit e cila ka dënuar sulmet e SHBA-së ndaj tre prej objekteve bërthamore të vendit dhe është zotuar “kurrë” të ndalojë programin e saj bërthamor, sipas mediave iraniane.

Organizata e Energjisë Atomike e Iranit, e cila mbikëqyr teknologjinë bërthamore të Iranit, tha se tre vendet kryesore – Fordow, Natanz dhe Isfahan – iu nënshtruan “sulmit të egër” në orët e para të mëngjesit të së dielës, raportoi agjencia shtetërore e lajmeve IRNA.

Agjencia i përshkroi sulmet si një “shkelje flagrante të ligjit ndërkombëtar, veçanërisht të Traktatit për Mospërhapjen e Armëve Bërthamore (NPT)”, dhe akuzoi mbikëqyrësin bërthamor të OKB-së, Agjencinë Ndërkombëtare të Energjisë Atomike (IAEA), për “bashkëpunim”.

Ajo i kërkoi bashkësisë ndërkombëtare të mbështesë Iranin dhe të dënojë sulmet e SHBA-së, dhe u zotua të “mos lejojë kurrë që përparimi i kësaj industrie kombëtare … të ndalet”.

---