Komuna e Ferizajt premton kompensim për fermerët e dëmtuar nga breshëri

---

Komuna e Ferizajt ka njoftuar se do të angazhohet për kompensimin e fermerëve të cilët kanë pësuar dëme në kulturat bujqësore si pasojë e reshjeve të fuqishme të breshërit që goditën rajonin më 4 gusht 2025.

Përmes një postimi në rrjetin social Facebook, komuna ka bërë të ditur se drejtori i Bujqësisë, Burim Bajrami, dhe drejtori i Shërbimeve Publike dhe Emergjencave, Alberton Sahiti, kanë vizituar nga afër një prej fermerëve të prekur në fshatin Gaçkë, për të parë gjendjen në terren.

“Drejtorët komunal u shprehën se Komuna, përmes Komisionit Profesional, do të bëjë vlerësimin e dëmeve të shkaktuara nga breshëri dhe do të angazhohet në kompensimin e tyre për fermerët e dëmtuar në bazë të mundësive buxhetore”, thuhet në njoftimin zyrtar.

Ferizaj është një nga komunat që herë pas here përballet me dëme nga kushtet ekstreme atmosferike, ndërsa autoritetet lokale kanë premtuar vëmendje të shtuar ndaj nevojave të bujqve vendas.

---