Zelensky thotë se është gati të takohet me Putinin, të enjten në Turqi

---

Presidenti ukrainas Volodymyr Zelensky tha se do të pranonte të takohej me udhëheqësin e Kremlinit, Vladimir Putin në Turqi të enjten, pasi presidenti i SHBA-së, Donald Trump i tha menjëherë të pranonte propozimin e Putinit për bisedime të drejtpërdrejta.

Udhëheqësi ukrainas ishte përgjigjur me kujdes më herët të dielën, pasi presidenti rus, në një deklaratë televizive, propozoi që Ukraina dhe Rusia të zhvillojnë bisedime të drejtpërdrejta në Stamboll të enjten e ardhshme, më 15 maj.

Megjithatë, nuk ishte e qartë nëse Putini kishte propozuar të merrte pjesë personalisht.

“Do ta pres Putinin në Turqi të enjten. Personalisht. Shpresoj që këtë herë rusët nuk do të kërkojnë justifikime”, shkroi Zelenskiy në X.

Propozimi i Putinit erdhi disa orë pasi fuqitë e mëdha evropiane kërkuan të shtunën në Kiev që Putini të binte dakord për një armëpushim 30-ditor pa kushte ose të përballej me sanksione të reja “masive”, një qëndrim që i dërguari i Trumpit në Ukrainë, Keith Kellogg, e mbështeti të dielën.

Edhe Zelensky kishte thënë se Ukraina do të ishte gati për bisedime me Rusinë, por vetëm pasi Moska të binte dakord për armëpushimin 30-ditor.

Por Trump, i cili ka fuqinë për të vazhduar ose ndërprerë furnizimin thelbësor të armëve të Uashingtonit për Ukrainën, ndoqi një qëndrim tjetër.

“Presidenti Putin i Rusisë nuk dëshiron të ketë një Marrëveshje Armëpushimi me Ukrainën, por dëshiron të takohet të enjten, në Turqi, për të negociuar një fund të mundshëm të GJAKMARRJES. Ukraina duhet të bjerë dakord për këtë, MENJËHERË”, shkroi Trump në Truth Social.

“Të paktën ata do të jenë në gjendje të përcaktojnë nëse një marrëveshje është e mundur apo jo, dhe nëse nuk është, udhëheqësit evropianë dhe SHBA-të do të dinë se ku qëndron gjithçka dhe mund të vazhdojnë në përputhje me rrethanat!”.

Putin dërgoi forcat e armatosura të Rusisë në Ukrainë në shkurt 2022, duke shkaktuar një konflikt që ka vrarë qindra mijëra ushtarë dhe ka shkaktuar konfrontimin më të rëndë midis Rusisë dhe Perëndimit që nga Kriza Kubane e Raketave të vitit 1962.

Me forcat ruse që po përparojnë, shefi i Kremlinit ka ofruar pak, nëse ka, lëshime deri më tani.

Në fjalimin e tij gjatë natës, ai propozoi atë që tha se do të ishte “negociata të drejtpërdrejta pa asnjë parakusht”.

Por pothuajse menjëherë, ndihmësi i lartë i Kremlinit, Yuri Ushakov, u tha gazetarëve se bisedimet duhet të marrin në konsideratë – si një marrëveshje paqeje të braktisur të vitit 2022, ashtu edhe situatën aktuale në terren.

---