Ka shumë më pak vetura me ndërrues manual, ja kur mund të ‘zhduken’ tërësisht nga tregu

---

Deri vonë, ndërruesit automatik ishin një gjë e rrallë, por sot ata janë shpesh opsioni i vetëm.

Viteve të fundit, gama e modeleve me ndërrues manual është zvogëluar ndjeshëm, kurse studimet konfirmojnë të njëjtën gjë, transmeton Telegrafi.

Për shembull, një studim i kryer nga CarGurus tregon se oferta e modeleve me ndërrues manual është ulur deri në 57 përqind në dhjetë vitet e fundit.

Studimi u krye mbi 30 markat më të njohura në tregun britanik. Sipas tij, në vitin 2015, 192 modele me ndërrues manual ishin në dispozicion në tregun e makinave të reja.

Në vitin 2023, ky numër ra në 109 modele, vitin e kaluar u ofruan 89, dhe këtë vit oferta ra në vetëm 82 modele.

Një pjesë e “meritës” për rënien e popullaritetit i takon elektromobilitetit.

Ka gjithnjë e më shumë makina të elektrizuara në treg, qoftë hibride me vetëkarikim dhe plug-in, ose makina thjesht elektrike.

Gjithashtu, me përparimet në teknologji, ndërruesit automatik kanë përmirësuar në mënyrë drastike performancën e tyre në aspektin e shpejtësisë së ndërrimit të shpejtësive, por edhe të mënyrës së funksionimit të tyre.

Sipas këtij studimi, opsionet e ndërruesit manual përbëjnë vetëm 29 përqind të ofertës.

Lexus, Mercedes dhe Volvo tashmë i kanë tërhequr ndërruesit manual nga ofertat e tyre, dhe që nga ky vit, as Mini dhe as Land Rover nuk i kanë ato.

Nëse vazhdon trendi i rreth shtatë modeleve që humbin opsionin e ndërruesit manual çdo vit, kjo teknologji mund të zhduket nga tregu që në vitin 2037.

---